Þann 4. október næstkomandi mun hin hrynkæra og ölhýra hljómsveit
 Milljónamæringarnir leika fyrir dansi á svokölluðu kvennakvöldi á
 Players í Kópavogi að tilefni 17 ára afmæli hljómsveitarinar.
 Milljónamæringarnir hafa ekki komið fram opinberlega síðan í desember
 2007.
 Hljómsveitin Milljónamæringarnir, með Karl Olgeirsson á piano,  
 Birgi Bragason og S.G sem hrynsveit og blástursjöfrana Jóel Pálsson á
 saxófón og Einar Jónsson á trompet, mun koma fram ásamt hinum
 glaðbeittu og eggjandi söngspírum Bogomil Font, sem ku hafa samið
 margar af perlum dægurtónlistarsögunnar en gefið eða selt  sökum
 vænisýki sinnar, Ragga Bjarna sem er einn helsti guðfaðir
 dægurlagasöngs á íslandi og Færeyjum og Bjarna Ara sem er ekki faðir
 Ragga heldur útvarpsmaðurinn geðþekki sem sér landslýð fyrir
 eyrnakonfekti á öldum ljósvakans. Saman munu félagar þessir flytja sín
 ástkærustu og vinsælustu lög og væntanlega framkalla hljóðbylgjur sem
 án efa munu hrista upp í  kvenþjóðinni og valda dömufríi um lönd og
 höf, en sérlega verður gert vel við hinn betri hluta mannkynsins þetta
 kvöld, því frítt  verður inn fyrir konur til klukkan 23.30.

 HEILL KVENNÞJÓÐINNI!

 Milljónamæringarnir